Stjórn félagsins

Andri er fæddur á Íslandi en ólst upp í Danmörku á árunum 1981–1996. Hann flutti aftur heim til Íslands árið 1996 og hefur búið hér síðan. Andri lauk BS-gráðu í sjúkraþjálfun og síðar meistaragráðu í heilbrigðisvísindum við Háskóla Íslands og hlaut í kjölfarið sérfræðiviðurkenningu í taugasjúkraþjálfun.

Hann starfaði í um tvo áratugi á endurhæfingarstofnun þar sem hann sinnti, auk klínískra starfa, vísinda-, kennslu- og stjórnunarstörfum. Að því loknu starfaði hann á einkarekinni sjúkraþjálfunarstöð og kom síðar á fót og rak sjúkraþjálfunarstöð á vegum sjúklingasamtaka. Undanfarið tvö ár hefur hann starfað við opinbera stjórnsýslu á sviði heilbrigðismála sem sérfræðingur í heilbrigðistækni.

Andri hefur um tveggja áratuga skeið sinnt stundakennslu og leiðbeint meistaranemum við Háskóla Íslands. Hann og fjölskylda hans hafa lengi styrkt börn í þróunarlöndum til náms, enda trúir hann því að menntun og þekking séu undirstaða velgengni bæði einstaklinga og samfélaga. Andri kynntist Maxwell Ditta á yngri árum og hefur orðið vitni að því heilsteypta starfi sem Maxwell hefur unnið í gegnum tíðina ásamt góðu starfsfólki í Pakistan og á Filippseyjum.

Auk starfa sinna fyrir Norrænu barnahjálpina er Maxwell jafnframt framkvæmdastjóri skólanna og verkefnanna í Pakistan og á Filippseyjum. Hann er upprunalega frá Pakistan en fluttist til Íslands með fjölskyldu sinni árið 1998.

Á meðan hann starfaði sem enskukennari við Borgarholtsskóla kom hann á fót starfinu í Pakistan og á Filippseyjum, með áherslu á að byggja skóla í fátækum samfélögum til að veita börnum í neyð tækifæri til menntunar. Starfið í Pakistan hófst árið 2005 og á Filippseyjum árið 2007. Þörfin var svo mikil að á fáeinum árum voru margir skólar byggðir og þúsundir barna skráðar í þá.

Á árunum 2008–2018 bjó Maxwell ásamt fjölskyldu sinni í Bandaríkjunum til að koma á fót Children's Aid USA með það að markmiði að hjálpa enn fleiri börnum. Nú, samhliða rekstri Children's Aid USA, starfar Maxwell í fullu starfi að þessum verkefnum með Norrænu barnahjálpinni. Áður en hann fluttist til Íslands starfaði Maxwell sem lektor og deildarstjóri kennslumála við Pakistan Adventist College. Hann þekkir gildi menntunar og trúir því að hún breyti lífum til hins betra.